2007年12月25日星期二

聖誕交叉扑之前度驚魂

某年,平安夜。

「妖!呢個乜叉豬扒Party黎架,d女仔咁既…」飲大兩杯既我,向邀請我黎玩既果位朋友投訴:「平安夜呀大佬,你咁大整蠱!」

「我為你好咋!」朋友拍拍我膊頭:「就係知道呢個場d女仔唔掂,所以先特登帶你黎。老友,你就快結婚啦,呢d場岩你架啦,安全唔會咁易搞出事呀。」

聽罷,我向朋友爆左句粗,就轉身走左去。個場既質素雖然差,不過老友多少有d用心良苦,呢樣我都理解既。

我一個人悶爆咁坐響Bar檯前面,突然見到同我幾個身位之隔,有一張曾經好熟悉既面孔。

我望住眼前呢個女孩子,第一個反應係:嘩,同以前讀書既時候,真係冇變過。

其實撞見自己既Ex,最令人心動既地方,唔係個Ex比同你拍拖果陣黎個女大十八變,變更加得美豔動人,而係佢仲保持住當日同你拍拖時既果一份氣質。以前你為佢迷倒既原因,就正正因為呢一份感覺。響一個冇預期既情況之下,從新感受呢一份失落多年既攝人氣質,感覺,其實幾震撼。

「喂,你又會響度既?好耐冇見。」女孩子大概已經發現左我既目光,正當我諗緊好唔好埋去打聲招呼既時候,佢已經採取主動。

「係呀,跟朋友黎之嘛。好耐冇見…」我感覺有些少尷尬:「你最近幾好嘛?」

「都係咁啦。」女孩子點了點頭:「你知我做audit,悶工一份,成日都係差唔多架啦。點似你做大生意咁刺激呀?聽班舊同學講,你盤生意呢幾年好似做得唔錯喎。」

「都算托賴啦…」我話。畢業之後,其實時不時都有d舊同學既聚會。或者當年分手既時候,女孩子同我實在分開得太難睇啦,所以每次有舊同學聚會既時候,果d搞手都會自動波咁either淨係叫佢,或者淨係叫我出席,以避免尷尬。咁多年黎,一直如是。「呢幾年經濟好左,生意就好做些少囉。我地做生意,三更窮五更富,邊夠你地做專業人仕穩定呀…」

大家微笑咁點左點頭。然之後,一陣dead air。

同女孩子分手之後,我其實曾經認真咁後悔過既。或者afterall呢個女孩子都唔會係我理想既太太,不過即使係分手,都應該分得得體一些。我會同自己講:算啦,果時大家年紀太細啦,唔識處理,所以先會搞到一鑊粥咁既遮。

年少唔懂事,係我響心裡面自我安慰既最大支持,不過隨住自己慢慢長大之後,反而越黎越覺得,「少不更事」唔應該係做錯事既籍口。因為歸根究抵,好多野,其實係源於自私。

「喂,查實你結左婚未?」女孩子率先打破果一陣短暫既沉默。

「幾個月後就會結啦。」我呼了一口氣:「咁你呢?」

「上個月岩岩又同男朋友散左啦。」女孩子飲左啖酒,向我展現出一個無奈既笑容:「你知我架啦,不嬲都俾人飛慣。」

我知。曾經飛過佢既人,包括我。

呢句有骨既說話,插得我幾鬼應。

「冇所謂啦,睇緣份啦。」女孩子嘆了一口大氣:「緣份未到,急都急唔黎。」

我無奈咁點了點頭。

「喂,有冇你未婚妻既相響身上面呀?」女孩子鬼馬地問:「等我睇下係咪真係靚過我咁多!」

「嘩,你有冇企圖架…」我講笑:「你唔好走去點佢相然之後搵人劃花佢塊面喎…」

哈哈哈哈哈哈。

我從銀包拎出一張2R size既相片俾女孩子睇。

「真係幾靚女喎…」女孩子笑了笑:「你揀女朋友既taste,咁多年都保持水準喎。」

「你兜個大圈讚自己遮…」我望左一望幅相,又望一望眼前呢個女孩子。其實某程度上,我覺得兩個女仔,響氣質上係有些少相似。畢竟人既品味同喜好,係有條路可以捉既。

傾左幾句,女孩子就有朋友拉左佢走啦。我曾經已為,分手之後如果有機會再見返面,應該係件好尷尬,好唔自在既事情。我曾經幻想過,假如我響條街度有一日撞返呢個女仔,我到抵應該點樣表現,同埋應該同佢講d乜野。

到事情真係發生既時候,原來一切都只係淡如水。

我其實一直都想同佢講返一句對唔住。

「懷緬過去何必呢,最緊要珍惜衣家擁有既。」身後傳黎一把男聲。

我回身望見同我一齊黎Party既老友。忽然我響度諗,你帶我黎個咁既爛場,其實係咪早有預謀?

對唔住,聖誕快樂。

--------------------------------

12 則留言:

火鶴 說...

小紅, 聖誕快樂!

errr.. 唔該, 咳咳.. 請代我話俾原作者聽, 首歌, 我鍾意張偉民個版本多D囉..

Carole 說...

你見唔到條線ge 咩
我加落去嫁
(你比個link 我改)
剛才好忙
係youtube到只係見到呢個
黃丹儀同伍樂城都唔錯

同埋仲下係who ar

Carole 說...

火雞哥哥

小紅都係訓唔著

你不如唱首歌仔比我聽

馬沙 說...

聖誕快樂

暫時嚟講,我最喜愛呢篇聖誕交叉扑!

Duke of Aberdeen 說...

謝謝你一直常來訪。聖誕快樂,樣樣都好。

渣估 說...

呢篇真係好正! 作者係....?

Merry Christmas!

火鶴 說...

咳咳.. 條線? 嘩幼到呢..
估下係who? 我唔知果喎, 我淨係知道張相入面個女仔真係靚到呢..

陳大文 部落 說...

有味道,味道係指有 feel 。

呢篇野,老實講,可以 picture 到係一幕劇本。

野蠻郡主 說...

咁又唔算係驚魂既…

不過…淡如水又真係幾無奈!

Carole 說...

多謝咁多位哥哥姐姐

et照單全收

估下係who? 我唔知果喎, 我淨係知道張相入面個女仔真係靚到呢..

係ar係ar
好靚嫁
靚到大家x晒暈

Carole 說...

灰姑娘
個名我改嫁

事關24日
et的前度
有找et

海火火女 說...

聖誕快樂!

原作者好似幾易估喎其實...